कोपरखैरणे परिसरातील जनसेवेचे मूर्तिमंत प्रतीक ठरलेल्या माजी नगरसेविका वैशाली नाईक यांच्या वाढदिवसानिमित्त आयोजित अभिष्टचिंतन सोहळ्यास नागरिकांचा उत्स्फूर्त प्रतिसाद लाभला. कोपरखैरणे सेक्टर-12 येथील मैदानावर आयोजित या सोहळ्यात मोठ्या संख्येने नागरिक उपस्थित राहिले आणि त्यांच्या ‘24 तास सेवा’ या कार्यशैलीवरील दृढ विश्वास व्यक्त केला.
नगरसेवक म्हणून कार्यरत असताना वैशाली नाईक यांनी प्रामाणिकता, पारदर्शकता आणि लोकाभिमुख दृष्टिकोन याच्या जोरावर कोपरखैरणेवासियांचा विश्वास संपादन केला. प्रभागातील मूलभूत सुविधांच्या उभारणीतून ते गरजूंना तातडीची मदत करण्यापर्यंत — विद्यार्थ्यांच्या शैक्षणिक प्रश्नांपासून हॉस्पिटलमधील आपत्कालीन परिस्थितीपर्यंत — त्या नेहमीच तत्परतेने धावून जातात. त्यामुळेच ‘नेहमी उपलब्ध’ असणारी लोकसेविका अशी त्यांची ओळख नागरिकांच्या मनात अधिक घट्ट झाली आहे.
विशेष म्हणजे, प्रभागातील महिलांनी मोठ्या संख्येने सहभाग नोंदवून वैशाली नाईक यांच्या सेवाभावी वृत्तीबद्दल कृतज्ञता व्यक्त केली. जनतेचा उत्साह, पाठिंबा आणि विश्वास हा त्यांच्या कार्यक्षमता आणि समाजाभिमुख दृष्टीकोनाचा पुरावा ठरला.
कार्यक्रमाच्या निमित्ताने स्नेहभोजनाचे आयोजन करण्यात आले होते, ज्यामुळे वातावरण अधिक आनंदमय आणि उत्साहपूर्ण बनले.
Leave a Reply