प्रजासत्ताक दिनाच्या परेडनंतर राजधानी दिल्लीतील करिअप्पा मैदानावर झालेल्या एनसीसी रॅलीमध्ये महाराष्ट्राच्या कन्या तनु भान हिने देशात आपला ठसा उमटवला आहे. महाराष्ट्र संचालनालयाची ज्युनिअर अंडर ऑफिसर असलेल्या तनु भान हिने आर्मी विंग (सीनियर विंग) मधून देशातील ‘सर्वोत्कृष्ट कॅडेट’ (Best Cadet) हा सर्वोच्च बहुमान पटकावला. एका दिमाखदार सोहळ्यात पंतप्रधान नरेंद्र मोदी यांच्या हस्ते तिला सुवर्ण पदक आणि मानाची ‘केन’ देऊन सन्मानित करण्यात आले.
देशभरातील १७ संचालनालयांतील सुमारे २० लाख कॅडेट्समधून निवड होत तनु भान हिने शिस्त, नेतृत्वगुण आणि अष्टपैलू कौशल्याच्या बळावर हे ऐतिहासिक यश मिळवले. ‘राष्ट्र प्रथम – कर्तव्यनिष्ठ युवा’ या ब्रीदवाक्याला सार्थ ठरवत तिने प्रशिक्षणातील सर्व कठीण टप्पे यशस्वीपणे पार करत देशात प्रथम क्रमांक पटकावला.
या वेळी कॅडेट्सना संबोधित करताना पंतप्रधान नरेंद्र मोदी यांनी तरुणांच्या राष्ट्रभक्तीचे कौतुक करत सांगितले की, आजचा युवा वर्ग ‘विकसित भारत’चा शिल्पकार आहे. त्यांचे परिश्रम, त्याग आणि अनुशासन देशाच्या प्रगतीसाठी मोलाचे असल्याचे त्यांनी नमूद करत तनु भान व इतर विजेत्यांचे विशेष अभिनंदन केले.
Leave a Reply