नवी मुंबई: नवी मुंबई महानगरपालिका क्रीडा, सांस्कृतिक व युवक कल्याण समितीचे सभापती गिरीश म्हात्रे यांनी समिती सदस्य व मनपाच्या क्रीडा विभागातील वरिष्ठ अधिकाऱ्यांसह शहरातील प्रमुख व महत्त्वाकांक्षी क्रीडा प्रकल्पांचा विस्तृत पाहणी दौरा केला. या दरम्यान त्यांनी प्रकल्पांची गुणवत्ता, देखभाल, सुरक्षा व्यवस्था आणि खेळाडू व नागरिकांना मिळणाऱ्या सुविधांचा प्रत्यक्ष आढावा घेत अधिकाऱ्यांना आवश्यक निर्देश दिले.
या दौऱ्यात उपसभापती रॉबिन मढवी, सदस्य मुनावर पटेल व निशांत भगत, क्रीडा व सांस्कृतिक विभागाच्या उपआयुक्त अभिलाषा म्हात्रे आणि क्रीडा अधिकारी रेवप्पा गुरव उपस्थित होते.
विविध क्रीडा संकुलांची पाहणी:
- घणसोली सेंट्रल पार्क: घणसोली येथील सेंट्रल पार्कच्या स्वच्छतेची व नागरी सुविधांची पाहणी करण्यात आली. स्थानिक नागरिकांनी मांडलेल्या समस्या तातडीने सोडवण्याचे आश्वासन सभापतींनी दिले.
- वाशी क्रीडा संकुल व जलतरण तलाव: वाशी सेक्टर-१२ येथील क्रीडा संकुल व ऑलिम्पिक दर्जाच्या जलतरण तलावाची अचानक पाहणी करण्यात आली. येथे पोहण्यासाठी येणाऱ्या लहान मुलांच्या व नागरिकांच्या सुरक्षेचा सविस्तर आढावा घेण्यात आला.
- नेरूळ क्लाइंबिंग वॉल व फुटबॉल मैदान: नेरूळ येथील क्लाइंबिंग वॉल सेंटर आणि सेक्टर-१९ येथील यशवंतराव चव्हाण फुटबॉल मैदानाला भेट देऊन खेळाडूंसाठीच्या सुविधा आणि मैदानांच्या देखभालीची पाहणी केली.
- राजीव गांधी स्टेडियम, सीबीडी बेलापूर: सीबीडी बेलापूर येथील राजीव गांधी स्टेडियमला भेट देऊन भविष्यात खेळाडूंसाठी अधिक आधुनिक व जागतिक दर्जाच्या सुविधा निर्माण करण्याबाबत सविस्तर चर्चा करण्यात आली.
राष्ट्रीय व आंतरराष्ट्रीय स्तरावर चमकणाऱ्या खेळाडूंना उत्तम प्रशिक्षण मिळावे यासाठी आंतरराष्ट्रीय दर्जाच्या प्रशिक्षकांची (Coaches) नियुक्ती करण्याबाबत समिती सकारात्मक विचार करत असल्याचे सभापती गिरीश म्हात्रे यांनी स्पष्ट केले.
Leave a Reply