नवी मुंबई महानगरपालिका अतिक्रमण विभागामार्फत शहरातील मार्जिनल स्पेसचा बेकायदेशीर वापर करणारे व्यावसायिक आणि अनधिकृत फेरीवाले यांच्याविरोधात सर्व विभाग कार्यालय क्षेत्रांमध्ये धडक मोहीम राबविण्यात येत आहे. बेलापूर विभागानंतर आज वाशी विभागात सेक्टर 17 आणि सेक्टर 2 परिसरात कारवाई करण्यात आली.
या कारवाईदरम्यान मार्जिनल स्पेसचा वापर करणाऱ्या व्यावसायिकांचे साहित्य जप्त करून कोपरखैरणे येथे जमा करण्यात आले. त्याचप्रमाणे एपीएमसी मार्केट परिसर, सेक्टर 19 येथेही अशाच प्रकारची कारवाई करण्यात आली असून, तेथील व्यावसायिकांचे साहित्य जप्त करण्यात आले. या संपूर्ण मोहिमेमध्ये १ लाख ५५ हजार रुपयांची दंडात्मक रक्कम वसूल करण्यात आली.
याशिवाय वाशी, तुर्भे, कोपरखैरणे आणि घणसोली विभागांतील अनधिकृत फेरीवाल्यांवरही कारवाई करण्यात आली. सर्व विभाग कार्यालय क्षेत्रांमध्ये विनापरवानगी लावलेले बॅनर्स हटविण्याची मोहीमही एकाच वेळी राबविण्यात आली.
महापालिका आयुक्त कैलास शिंदे यांच्या निर्देशानुसार, अतिरिक्त आयुक्त राहुल गेठे आणि अतिक्रमण विभागाचे उपआयुक्त कैलास गायकवाड यांच्या मार्गदर्शनाखाली ही धडक कारवाई सुरू आहे. नागरिकांना रस्ते व पदपथ सुरक्षित आणि अडथळामुक्तपणे वापरता यावेत, यासाठी अनधिकृत बांधकामे, अतिक्रमणे, मार्जिनल स्पेसचा गैरवापर आणि अनधिकृत फेरीवाल्यांविरोधात ही मोहीम पुढेही सातत्याने सुरू राहणार आहे.
Leave a Reply