केंद्र सरकारच्या ‘सफाई अपनाओ – बिमारी भगाओ’ अभियानांतर्गत राबविण्यात येणाऱ्या उपक्रमांमध्ये लोकसहभागावर भर देण्यात येत असून नागरिकांचा उत्साही सहभाग सर्वच उपक्रमांमध्ये लाभताना दिसत आहे. अशाच प्रकारचा एक अभिनव स्वच्छता व आरोग्य विषयक जनजागृती उपक्रम लेट्स सेलिब्रेट फिटनेस या संस्थेच्या सहयोगाने तृतीयपंथी नागरिकांच्या सक्रीय सहभागातून वाशी विभागात राबविण्यात आला.
या अंतर्गत वाशी विभागाचे सहा. आयुक्त सुखदेव येडवे व स्वच्छता अधिकारी श्रीम.जयश्री आढळ यांच्या नियंत्रणाखाली लेट्स सेलिब्रेट फिटनेस संस्थेच्या प्रमुख श्रीम.रिचा समित यांच्या मार्गदर्शनानुसार तृतीयपंथी नागरिकांनी सेक्टर 9 वाशी येथील फळ व भाजी मार्केटमध्ये जाऊन स्वच्छताविषयक जनजागृतीपर पत्रकांचे वाटप केले. यावेळी त्यांनी व्यावसायिकांना कचरा वेगवेगळा ठेवण्याचे महत्व सांगितले व भाजी व फळांचा कचरा योग्य ठिकाणी ठेवण्याचे आवाहन केले. तसेच विक्रेत्यांनी स्वत: प्लास्टिक पिशव्यांचा वापर करू नये तसेच ग्राहकांनाही प्लास्टिकऐवजी कापडी पिशव्यांचा वापर करण्याचा आग्रह धरावा असेही व्यावसायिकांना सूचित करण्यात आले.
त्याचप्रमाणे काही तृतीयपंथी नागरिकांनी सेक्टर 9 व 16 मधील छत्रपती शिवाजी महाराज चौकात सिग्नलला थांबणाऱ्या वाहनांच्या मालक, चालकांमध्ये कचरा वर्गीकरण तसेच एकल वापर प्लास्टिक बंदी या विषयी हातात ‘सफाई अपनाओ – बिमारी भगाओ’ अभियानाचे फलक दाखवित जनजागृती केली.
वाशी विभागात राबविण्यात आलेल्या प्लास्टिक प्रतिबंधात्मक मोहीमेत प्लास्टिकचा वापर आढळलेल्या व्यावसायिकाकडून रु.5000/- दंडात्मक रक्कम वसूल करण्यात आली. तसेच सार्वजनिक ठिकाणी कचरा टाकून उपद्रव करणाऱ्या 3 व्यावसायिकांकडून प्रत्येकी रु.250/- दंड वसूल करण्यात आला.
कोपरखैरणे विभागातील एमआयडीसी परिसरात सहा.आयुक्त श्री.भरत धांडे व स्वच्छता अधिकारी श्री.राजूसिंह चव्हाण यांच्या नियंत्रणाखाली प्लास्टिक प्रतिबंधात्मक भरारी पथकाने एकल वापर प्लास्टिक आढळल्याने भास्कर डेअरी यांच्याकडून रु.5000/- रक्कमेची दंडात्मक वसुली केली.
महापालिका आयुक्त डॉ.कैलास शिंदे यांच्या मार्गदर्शनाखाली तसेच अतिरिक्त आयुक्त श्री.सुनिल पवार यांच्या नियंत्रणाखाली संपूर्ण नवी मुंबई महापालिका क्षेत्रात राबविण्यात येत असलेल्या ‘सफाई अपनाओ – बिमारी भगाओ’ अभियानांतर्गत घनकचरा व्यवस्थापन विभागाचे उपआयुक्त डॉ.अजय गडदे व श्रीम.स्मिता काळे यांच्या माध्यमातून राबविण्यात येणाऱ्या उपक्रमांमध्ये आबालवृध्दांसह महिलांचाही मोठया प्रमाणावर सहभाग लाभत असून आज तृतीयपंथी नागरिकांनीही अभियानात सहभागी होत शहर स्वच्छतेत आपले योगदान दिले.
Leave a Reply